Сүүлийн 24 цагийн хугацаанд 49 хүнээс халдвар илэрсэн талаар бид мэдээлсэн билээ. Тэгвэл тэдний 10 нь "Нэг хаалга-Нэг шинжилгээ”-нд хамрагдсан хүмүүс аж.

Энэ талаар ХӨСҮТ-ийн Тандалт, судалгааны албаны дарга А.Амбасэлмаа “Нэг хаалга-Нэг шинжилгээ”-нд хамрагдсан 10 хүний хариу эерэг гарлаа. Ингэснээр олон нийтийн дундаас халдвартай 37 хүнийг бид олж тогтоогоод байна. Өөрөөр хэлбэл, “Нэг хаалга- Нэг шинжилгээ”-нээс нийтдээ 37 хүнээс халдвар илэрсэн нь батлагдсан. Баянгол дүүргийн гурав, 12, 25, Баянзүрхийн 26, Сүхбаатарын 18, Сонгинохайрхан дүүргийн зургаа, долоо, 18, 31, 39, Хан-Уулын хоёр, дөрөв, Чингэлтэйн хоёр, зургаа, 12 дугаар хорооны оршин суугчдаас халдвар илрээд байна” гэв.