Засгийн газар, УОК-оос шат дараатай сонголттой вакцин хийх ажлыг зохион байгуулахаар төлөвлөж байна. Эхний ээлжинд "Астразеника",  "Файзер" вакциныг оруулж ирэх бөгөөд  эмч, эмнэлгийн ажилчдаа хамруулахаар төлөвлөж байгаа. Энэ талаар ХӨСҮТ-ийн Дархлаажуулалтын албаны дарга О.Дашпагма "Вакцин болгон хэрэглэх заавартай. Зааврын дагуу вакцинд хамрагдахгүй байх заалт гэж бий. Тухайлбал, вакцин хийлгэх гэж байгаа хүн халуунгүй, эрүүл байх ёстой. Үүнээс гадна халдварт өвчнөөр өвдөөгүй байх шалгуур тавьж, эмчийн зөвшөөрлөөр вакцинд хамруулна.

Одоогийн орж ирэх "Файзер" вакциныг харахад эмийн болон бусад төрлийн бүтээгдэхүүнд харшилтай хүмүүст харшлын урвал өгөх эрсдэлтэй байна. Мөн одоогийн бүтээсэн вакцинууд жирэмсэн эхэд хийх боломжгүй байгаа. "Ковид-19" халдвар аваад эдгэсэн хүнд гурван сарын дараа вакцин хийхийг зөвлөж байна. Мөн зорилтод бүлгийн иргэдээ эрэмбэлэхийг зөвлөж байгаа. Тиймээс бид эмч, эмнэлгийн ажилтнуудыг нэн тэргүүнд тавьж байгаа юм" гэлээ.