Гадаадаас эх орондоо ирэх хүсэлтэй иргэдийг татан авах асуудлаар Засгийн газрын хэвлэл мэдээлэл, олон нийттэй харилцах албаны дарга   Ц.Ганзориг мэдээлэл өглөө. Тэрбээр "Гадаадаас 9943 иргэн яаралтай эх орондоо ирэх хүсэлтэй байна. Гэхдээ Гадаад харилцааны яамнаас яаралтайгаар буюу ойрын хоёр сарын хугацаанд эх орондоо ирэх хүсэлтэй хүмүүсийг бүртгэхэд 2700 орчим иргэн байна гэх судалгаа гаргасан. УОК-оос өчигдөр ирэх сард нийтдээ 12-оос доошгүй удаа тусгай үүргийн нислэг үйлдэж иргэдээ татан авах хуваарь гаргасан.

 

Эх орондоо ирэх хүсэлтэй байгаа иргэдийн 50-60 хувь нь БНСУ-д оршин сууж байна.

 

Тиймээс ирэх сард, Сөүл рүү зургаа, Токио руу гурав, Европ руу хоёр, Нур-Султан руу нэг удаагийн нислэг тус тус үйлдэхээр болсон. Мөн дөрөвдүгээр сард ч 12-14 удаагийн тусгай үүргийн нислэгээр иргэдээ авчирна. Удахгүй нислэгийн хуваарийг танилцуулна. Шадар сайдын зүгээс нислэгийн билетийн үнийг бууруулах чиглэлд үүрэг даалгавар өгсөн. Энэ асуудлыг яг одоо Засгийн газрын хуралдаанаар хэлэлцэж байна. Тиймээс билетний үнийг хэдэн хувиар бууруулах нь тодорхой болохоор нь зарлана" гэв.