Засгийн газар Эрүүл мэндийн яамнаас цаг үеийн мэдээлэл өгөх үеэр гуравдугаар сарын 1-нээс бүх шатны сургалтын байгууллагыг танхимаар хичээллүүлэх эсэх асуудлаар мэдээлэл өгсөн. Засгийн газрын хэвлэл мэдээлэл, олон нийттэй харилцах албаны дарга Ц.Ганзориг "Ирэх сарын 1-нээс танхимын сургалтыг эхлүүлэх саналыг Боловсрол шинжлэх ухааны яамнаас гаргаад байгаа. Өчигдөр УОК-ын V өргөтгөсөн хуралдаан болж, Шадар сайд байр сууриа илэрхийлсэн.

Ирэх гурав, дөрөвдүгээр сард дархлаажуулалтын  ажил явагдана. Тиймээс энэ хугацаанд танхимын хичээлийг эхлүүлэх нь  эрсдэлтэй байж болзошгүй гэж үзэж байгаа. Сургуулийн анги танхимыг дархлаажуулах танхим болгоно гэдэг талаар яам дэмжихгүй байгаа. Ер нь хичээл сургуулийг танхимаар эхлүүлэх талаар эцсийн шийдвэр гараагүй. Боловсрол, шинжлэх ухааны яам саналаа хүргүүлээд байна" гэсэн юм.