“Нэг өрх-нэг шинжилгээ”-ний явц, коронавирусийн халдварын нөхцөл байдлын талаар Засгийн газар, Эрүүл мэндийн яамнаас мэдээлэл өгч байгаа.

 

Энэ үеэр Засгийн газрын хэвлэл мэдээлэл олон нийттэй харилцах  албаны дарга Ц.Ганзориг “Өчигдөр хүнсний бөөний төвүүдийг нээсэн. Үүнтэй холбоотой шинжилгээ өгсөн хүн хөдөлгөөнд оролцож болох нь гэсэн ойлголт гадуур байна.  Ингээд гадуур хөл хөдөлгөөн эрс нэмэгдэж, автобусаар зорчих иргэдийн тоо 12-19 мянга болж 50 хувиар нэмэгдсэн. Зайлшгүй ажиллах ёстой 14 салбарын хүмүүсээс гадна гэртээ байх ёстой хүмүүс хөдөлгөөнд оролцож, алба хаагчдад хүндрэл учруулж байна. Цар тахлын хавьтлын эрсдлийг ихэсгэж байна.

 

Зайлшгүй ажиллах ёстой 14 салбарын ажилчид 15 хувийн квотдоо тааруулж л хөдөлгөөнд оролцоно. Хуурамч ажлын үнэмлэх үзүүлэх асуудал гарч байна. Бид энэ сарын 23-наас шинэ амьдралын хэв маяг руу орохын тулд өрх бүрээс шинжилгээ авч байгаа. Одоо шинжилгээ 55 хувьтай явж байна. Үлдсэн зургаан хоногт өдөрт дунджаар 30 мянган өрхөөс шинжилгээ авах бол 180 мянга орчим өрхөөс шинжилгээ авч дуусна. Хэрвээ хөл хөдөлгөөн нээлттэй байсан бол 27 хүний ард байгаа маш олон өвчлөлтэй хүн голомтын тоог нэмэх байсан. Тиймээс гэр гэртээ хөл хориогоо баримтлахыг хүсэж байна” гэлээ.