Эрүүл мэндийн яамнаас цаг үеийн асуудлаар мэдээлэл өгч байна. Өнгөрсөн 24 цагийн хугацаанд коронавирусийн халдвар авсан хүний тоо 28 хүнээр нэмэгдсэн бол 17 хүн эдгэрч гарчээ. ХӨСҮТ-ийн Тандалт, судалгааны албаны дарга А.Амбасэлмаагийн мэдээлж буйгаар голомтууд нэлээд хумигдаж байгаа бөгөөд одоо Баянзүрх дүүргийн 36 дугаар байр буюу 16 дугаар хороолол орчим, "Амгалан" амаржих газар, "Монгол шир" компанийн голомтууд идэвхтэй байна гэсэн юм. "Монгол шир" компаниас голомтлон гарсан халдварын тоо 140-д хүрчээ. Үүнээс 20 гаруй ажилтны гэр бүлийн, найз нөхдийн ойрын хавьтлууд нэмэгдэж байгаа аж. Мөн "Цахиур төмөр" ХК-д халдварын тархалт идэвхтэй байна гэв.