“Нэг хаалга-нэг шинжилгээ” болон сүүлийн өдрүүдэд коронавирусийн халдварыг илрүүлэхээр улсын хэмжээнд хийсэн шинжилгээний хариуг ХӨСҮТ-өөс танилцууллаа.

ХӨСҮТ-ийн Тандалт, судалгааны албаны дарга А.Амбасэлмаа “Сүүлийн 24 цагт 37 мянга 530 хүнд шинжилгээ хийснээс 33 хүнээс халдвар илэрлээ. Эдгээр иргэн өмнө нь батлагдсан тохиолдлуудын хавьтал болон "Нэг хаалга-Нэг шинжилгээ" ажлын хүрээнд халдвар авсан нь батлагдсан. Үүний 24 нь хавьтлын шинжилгээгээр илэрсэн. Харин есөн тохиолдол нь "Нэг хаалга-Нэг шинжилгээ" ажлын хүрээнд илэрсэн. 

“Нэг хаалга-нэг шинжилгээ”-ний хүрээнд 26 хүнээс коронавирус илэрлээ

Энэ сарын 11-нээс хойш "Нэг хаалга-Нэг шинжилгээ" ажлын хүрээнд 200 мянган гаруй хүнийг шинжилгээнд хамруулж өнөөдрийн байдлаар нийт 26 халдварын батлагдсан тохиолдол илрээд байна. Халдварын нэг тохиолдлыг илрүүлэхэд хамгийн багадаа 4-5 цаашдаа хэдэн зуу хүртэлх хавьтлыг шинжилж, илрүүлдэг чухал ач холбогдолтой” гэв.

Ингэснээр улсын хэмжээнд коронавирусийн батлагдсан тохиолдол 2416 болж, 1760 хүн эдгэрчээ. Эмчилгээнд байгаа 643 хүний биеийн байдлыг үнэлбэл маш хүнд хоёр, хүнд гурав, хүндэвтэр 77, хөнгөн 561 байна.