“Нэг хаалга-нэг шинжилгээ” хийгдэж байгаатай холбогдуулан голомтын идэвхжилт буурч байгаа аж. Энэ талаар ХӨСҮТ-ийн Тандалт, судалгааны албаны дарга А.Амбасэлмаа “Одоогийн байдлаар нийслэлийн хэмжээнд зургаан голомт маш идэвхтэй байна. Тухайлбал, 116 дугаар сургуулийн голомт, 21 дүгээр худалдааны төв, “Монгол шир” ХХК, бөөрний эмнэлэг, нийслэлийн “Амгалан” амаржих газартай холбоотой голомтууд идэвхтэй байгаа. Ойрын хавьтлууд маш ихээр халдварт өртөж байна. Манай улсад хавьтлаас халдвар илрэх тохиолдол ихсэж байгаа. Одоогийн байдлаар батлагдсан тохиолдлын ойрын хавьтал 1046, хоёрдагч хавьтал 2346 хүн байна” гэв.