Вакцинжуулалтын бэлтгэл ажлыг хангах ажлын хүрээнд Шадар сайд, УОК-ын дарга С.Амарсайхан, Эрүүл мэндийн сайд С.Энхболд нар өчигдөр ХӨСҮТ-д ажиллав. Эхний ээлжинд орж ирэх вакцины  хадгалалт, тээвэрлэлт, нөөцлөлтийг хэрхэн зохион байгуулах талаар эмнэлгийн удирдлагууд дэлгэрэнгүй мэдээлэл өглөө.  Вакцин хадгалах нөөцлөх гурван төрлийн хөргүүр, зөөврийн сав, хүйтэн хайрцаг, стандартын шаардлага  хангасан тээвэрлэх машин ХӨСҮТ-д бэлэн байгаа аж. Вакцинжуулалттай холбогдуулан аймаг, сум, дүүргийн өрхийн Эрүүл мэндийн төвийн 300 гаруй эмнэлгийн албан хаагчдыг сургалтад хамруулж бэлтгэсэн байна. Дархлаажуулалтыг эхлэхээс өмнөх зохион байгуулалт, эрүүл мэндийн ажилтнуудыг бүрэн сургах, илүү цагаар ажилласан цалинг нэмэгдүүлэх, дархлаажуулалтын дараа гарч болох хариу урвалыг хянах, учирч болох эрсдэлийг тооцсон  бүх бэлтгэлийг өндөр түвшинд хангасан байх шаардлагатайг Шадар сайд анхаарууллаа. Салбар хоорондын уялдаа холбоог сайжруулж, ариутгал халдваргүйжүүлэлтийг эрчимжүүлэх, вакцины хадгалалт, нөөцлөлт, тээвэрлэлтэд анхаарч ажиллах чиглэлийг Эрүүл мэндийн сайдад өгөв.

Эх сурвалж: Монгол Улсын Шадар сайдын мэдээлэл