Багануур дүүрэгт коронавирусийн халдвартай хоёр иргэн илэрсэн байна. Тодруулбал, өчигдөр буюу шинийн 1-нд тус дүүрэгт халдвартай байж болзошгүй хоёр иргэн илэрч, түргэвчилсэн оношлуураар эерэг хариу гарчээ. Тэр даруйд ХӨСҮТ-д шинжилгээг явуулахад өнөөдөр шинжилгээний хариу эерэг гарсан аж. Тэд гэр бүлийн хүмүүс бөгөөд "Амгалан" амаржих газрын халдварын голомт. Гурав дахь шинжилгээгээр  хариу эерэг гарч, баталгаажсан гэнэ. Үүнээс өмнө хоёрдугаар сарын 9, 11-нд шинжилгээ өгчээ.

Энэ талаар тус дүүргийн Засаг даргын орлогч Б.Балжинням болон холбогдох албаныхан мэдээлэл хийлээ.  Дүүргийн Эрүүл мэндийн төвийн дарга Д.Шинэбаяр "Бид үүнтэй холбоотойгоор өчигдөр ойрын болон дам хавьтал, тэдгээрийн явсан маршрутыг гаргаж байна. Иймд иргэд та бүхэн аль болох гэрээсээ гарахгүй байж, шинжилгээд хамрагдаарай. Ойрын хавьтлын судалгаа гарсан, шинжилгээг гэрээр авна" гэв. Мөн Улаанбаатар хотоос сүүлийн 10 хоногт ирсэн иргэд гэрийн тусгаарлалтыг мөрдөхийг хүслээ.