Улаанбаатар хотоос Дорнод аймагтаа ирэх хүсэлт гаргасан иргэдийг Сар шинийн баяраас өмнө татан авах ажлыг Аймгийн онцгой комисс, Шуурхай штабын шийдвэрээр хоёрдугаар сарын 7, 9-ний өдрүүдэд зохион байгуулж, автобусаар нийт 85 иргэнийг татан авчээ.

 

Гэвч 9-ний өдрийн автобусаар ирэх зөвшөөрөлтэй 45 иргэний дотор шинжилгээний хариу гараагүй дөрвөн иргэнийг тухайн үед нь автобуснаас үлдээсэн. Харин иргэн Б-ын нэр, бичиг баримт, шинжилгээний хариуг ашиглан иргэн Н автобусанд сууж Улаанбаатар хотоос гарчээ.

 

Түүнчлэн Хөлөнбуйрын постоор нэвтрэх үедээ ч иргэн Б-ын нэрээр мэдээлэл, гэрийн тусгаарлалтын баталгааг бөглөж орж ирснийг хоёрдугаар сарын 10-ны өдөр СЭМТ, Тандалтын бүлэг илрүүлж, Шуурхай штабт яаралтай мэдээлж, цагдаагийн газарт шилжүүлэн шалгалтын ажил явагдаж байна.

 

Иргэн Н нь хоёрдугаар сарын 9-ний өдөр Баянзүрх дүүргийн гуравдугаар байнгын цэгт шинжилгээ өгч, хариу 10-ны өдрийн 15:58 цагт сөрөг гарсан. Шинжилгээний хариу гараагүй байхад Дорнод аймаг руу нэвтэрсэн иргэн Н-ий PCR нь эерэг гарсан бол түүнтэй нэг автобусанд ирсэн 41 иргэнд халдвар тараагаад зогсохгүй аймгийн хэмжээнд халдварын голомт үүсгэх маш том эрсдэл дагуулах байлаа гэж Аймгийн онцгой комисс, Шуурхай штаб мэдээллээ.