Эрүүл мэндийн яамнаас коронавирусийн халдварын нөхцөл байдлын талаар мэдээлэл хийлээ. Сүүлийн 24 цагийн хугацаанд улсын хэмжээнд шинээр 38 тохиолдол батлагджээ. Энэ талаар ХӨСҮТ-ийн Тандалт, судалгааны албаны дарга А.Амбасэлмаа “ХӨСҮТ, ЗӨСҮТ, НЭМТ, Дархан-Уул, Сэлэнгэ, Орхон, Дорнод, Ховд аймагт нийтдээ 14283 хүнд PCR шинжилгээ хийсэн. Үүнээс 38 хүнээс коронавирусийн халдвар илэрлээ.

Халдварын тохиолдлууд Улаанбаатар хотод бүртгэгдсэн. Эдгээр нь өмнөх батлагдсан тохиолдлын ойрын хавьтлууд байгаа юм. Сүүлийн үед халдварын тохиолдол нэмэгдэж, хавьтлын тоо нэмэгдэж байна. Улаанбаатар хотод нийт 1092 тохиолдол боллоо" гэсэн юм. Түүнчлэн нийслэлд идэвхтэй таван голомт байгаа бөгөөд "Монгол шир" компанийн эх үүсвэр тодорхойгүй байгаа юм. Үүнтэй холбоотой өргөжүүлсэн тандалт хийхэд долоон хүнээс нэмж халдвар илэрчээ.