“Монгол шир” ХХК-ийн ажилтнаас хоёрдугаар сарын 1-нд халдвар илэрч, ойрын 72 хүнээс шинжилгээ авчээ. Ингэхэд ажлын газрынх нь 17 хүн коронавирусийн халдвартай нь батлагджээ. Халдвар илэрсэн “Монгол шир” ХХК-ийн 18 ажилтан зургаан дүүргийн 12 хороонд амьдардаг аж. Ингэснээр халдварын голомт эрчимтэй, идэвхтэй тархаж байгааг албаныхан мэдээллээ.

Энэ талаар ХӨСҮТ-ийн Тандалт, судалгааны албаны дарга А.Амбасэлмаа “Баянзүрхийн дөрөв, Баянголын хоёр, Сүхбаатарын нэг, Чингэлтэй дүүргийн нэг, Хан-Уулын гурав, Сонгинохайрхан дүүргийн таван хороонд “Монгол шир” ХХК-ийн ажилтнууд амьдардаг. Ингэснээр дээрх хороонд шинээр өвчлөл нэмэгдсэн гэсэн үг. Мөн сүүлийн үед ойрын хавьтлын тоо эрс нэмэгдэж байна. Зөвхөн өчигдрийн байдлаар ойрын хавьтал болох 250 хүнийг илрүүлж, тусгаарлалаа. Улсын хэмжээнд нийтдээ ойрын хавьтал 1050, хоёрдогч хавьтал 5000 гаруй хүн байна” гэв.