Эрүүл мэндийн яамнаас коронавирусийн халдварын нөхцөл байдлын талаар мэдээлэл хийлээ. Сүүлийн 24 цагийн хугацаанд улсын хэмжээнд шинээр 31 тохиолдол батлагджээ. Энэ талаар ХӨСҮТ-ийн Тандалт, судалгааны албаны дарга А.Амбасэлмаа “ХӨСҮТ, ЗӨСҮТ, НЭМТ, Дархан-Уул, Сэлэнгэ, Орхон, Дорнод, Ховд аймагт нийтдээ 16960 хүнд PCR шинжилгээ хийсэн. Үүнээс 31 хүнээс коронавирусийн халдвар илэрлээ. Халдварын тохиолдлууд Улаанбаатар хотод бүртгэгдсэн. Улаанбаатар хотод шинээр хоёр том голомт үүслээ. “Монгол шир” ХХК-ийн 18 ажилтан, нийслэлийн “Амгалан” амаржих газраас хоёр тохиолдол батлагдлаа. Харин үлдсэн нь батлагдсан тохиолдлын ойрын хавьтлууд байна” гэв.