Эрүүл мэндийн яам болон ХӨСҮТ-өөс өнөөдөр коронавирусийн нөхцөл байдлын талаарх ээлжит мэдээлэл хийх үеэр халдвар авсан дөрвөн иргэн нас барсан тухай тоон мэдээлэл ил болсон. Мөн өчигдөр “Тоёоко Инн” зочид буудалд тусгаарлаж байсан 39 иргэнээс халдвар илэрч, ХӨСҮТ рүү шилжүүлсэн юм. Харин энэ талаар өнөөдөр 11:00 цагийн мэдээгээр дурдаагүй учир иргэдийн дунд эргэлзээ төрөөд байгаа. Дээрх асуудлуудад ХӨСҮТ-ийн Тандалт, судалгааны албаны дарга А.Амбасэлмаа тайлбар өгч, сэтгүүлчдийн асуултад хариуллаа.

-Коронавирусийн халдвар авсан дөрвөн иргэн нас барсан. Сүүлд нэмэгдсэн хоёр нас баралт хэзээ бүртгэгдсэн бэ?

-Коронавирусийн халдвар 2020 оны арваннэгдүгээр сарын 11-нээс өнөөдрийг хүртэл бүртгэгдэх хугацаанд дөрвөн иргэн нас барсан. Эдгээр иргэний хоёр нь коронавирусээр өвчилж, эмчлэгдээд гарсныхаа дараа зүрх судасны өвчлөлөөр нас барсан. Харин хоёр нь эмчлэгдэж байх явцдаа нас барсан. Энэ хоёр хүн мөн л архаг хууч өвчтэй, өндөр настай хүмүүс байсан. Тодруулбал, 2020 оны арванхоёрдугаар сарын 25, нэгдүгээр сарын 5, 12, 22-нд энэ хүмүүс нас барсан.

 “ТОЁОКО ИНН” ЗОЧИД БУУДАЛ ХАЛДВАРЫН ГОЛОМТ БОЛСОН ГЭЖ ОЙЛГОЖ БОЛОХГҮЙ

-“Тоёоко Инн” зочид буудалд тусгаарлагдаж байсан, халдвар авсан 39 иргэнийг өчигдөр ХӨСҮТ рүү зөөвөрлөсөн. Эдгээр иргэд хэрхэн халдвар авсан талаар дэлгэрэнгүй мэдээлэл өгөхгүй юү?

-Ажиглан тусгаарлах байранд халдвар илэрсэн тухай бүрд ойрын хавьтлуудыг тусгаарладаг. Сүүлийн долоо хоног, ялангуяа сүүлийн гурав хоногт өдөрт 35-37, 25-26 тохиолдол бүртгэгдсэн. Батлагдсан тохиолдлын тоо нэмэгдэхийн хэрээр хавьтлын тоо мөн ихэснэ. Тэр бүх хүнийг тусгаарласан. Тухайлбал, “Тоёоко Инн” зочид буудалд 300 гаруй хүнийг тусгаарласан. Тэд сүүлийн долоо хоногт коронавирусээр өвчилсөн хүмүүсийн ойрын хавьтлууд. Тэдгээр иргэн дотроос тусгаарлагдаад нэг, хоёр хонож байгаа хүмүүсийн анхны болон давтан шинжилгээгээр халдвар илэрсэн. Тэр хүмүүсийг өчигдөр ХӨСҮТ рүү зөөвөрлөсөн. Иймд “Тоёоко Инн” зочид буудал халдварын голомт болсон гэж ойлгож болохгүй. Тусгаарлах байранд долоо хоног байлгаж, хоёр удаа шинжилгээ авсны дараа хариу нь сөрөг гарсан бол гэрийн тусгаарлалтад шилжүүлж байгаа.