Санхүүгийн тогтвортой байдлын зөвлөлийн ээлжит бус хурал өчигдөр болж, “Ковид-19” цар тахлаас урьдчилан сэргийлэх, нийгэм, эдийн засагт үзүүлэх сөрөг нөлөөллийг бууруулах, цаашид авч хэрэгжүүлэх арга хэмжээний талаар хэлэлцжээ.

Улсын төсвөөс 2020 онд коронавирусийн халдвараас урьдчилан сэргийлэх чиглэлээр нийт 2.4 их наяд төгрөгийн арга хэмжээ хэрэгжүүлсэн аж. Харин энэ онд тус чиглэлээр улсын төсвөөс 1.7 их наяд төгрөг зарцуулахаар байна.

Түүнчлэн Монголбанк, Санхүүгийн зохицуулах хорооноос мөнгөний бодлогын хүү болон банкуудын заавал байлгах нөөцийн хувийг тус бүр зургаан хувь болгон бууруулж, иргэн, аж ахуйн нэгжийн авсан зээлийн төлбөрийг 2021 оны долдугаар сарын 1 хүртэл хойшлуулах, цаашид эдийн засгийг идэвхжүүлэх арга хэмжээг хэрхэн үр дүнтэй хэрэгжүүлэх талаар хэлэлцжээ.