Эрүүл мэндийн яамнаас ээлжит мэдээллээ хийлээ. Нэгдүгээр сарын 29-нд нийтдээ 14495 хүнд PCR шинжилгээ хийхэд 32 хүнээс коронавирус илэрсэн байна. Энэ нь Улаанбаатар хотод илэрсэн бөгөөд өмнөх батлагдсан тохиолдлуудын ойрын хавьтал гэлээ. 

Өчигдөр Интермэд эмнэлэгт дөрвөн хүн сайн дураар шинжилгээ өгөхөд хариу нь эерэг гарсан байна. Ингээд ХӨСҮТ-д PCR шинжилгээ хийж баталгаажуулжээ. Халдвар авсан нэг иргэний биеийн байдал маш хүнд байгаа гэлээ. Тухайн иргэн гэртээ халдвараа хүндрүүлсэн талаар ЭМЯ-наас мэдээлж байна. Мөн Дорноговь аймагт очсон иргэнээс сэжигтэй тохиолдол илэрсэн учраас хариуг нь баталгаажуулахаар Улаанбаатар хот руу явуулсан байна. Монгол Улсын хэмжээнд халдвар авсан хүний тоо 1742 болсон бол үүнээс 75.8 хувийг нь эмчилжээ.

Сайн дураараа шинжилгээ өгсөн хүмүүсээс халдвар илэрч байгаа учраас хүн амын дунд шинж тэмдэггүйгээр тархсан байна. Тиймээс аль болох гэрээс гарахгүй, халдвар хамгааллын дэглэмээ сайтар мөрдөхийг анхааруулж байна.