Коронавирусийн эсрэг “Новавакс” шинэ вакцин нь Их Британид хийсэн туршилтаар 89.3 хувийн эерэг нөлөө үзүүлж буй нь батлагджээ. Энэхүү вакцин нь Их Британид бүртгэгдсэн коронавирусийн шинэ хувилбарын эсрэг үр дүнтэй нь батлагдсан анхны вакцин болж байна.  Их Британийн Ерөнхий сайд энэхүү мэдээг талархан хүлээж авч, 60 сая тунг үйлдвэрлэх нөхцөл байдлыг хангасан байна.

 Их Британи Улсын Эм, эрүүл мэндийн бүтээгдэхүүнийг зохицуулах газар хүлээн зөвшөөрвөл ирэх хоёрдугаар сарын дундуур олон нийтэд тарьж эхлэхээр төлөвлөж буй аж.

“Новавакс” вакцин гарган авах сүүлийн шат буюу гуравдугаар шатны туршилтад 18-84 насны сайн дурын 15 мянган хүнийг хамруулсан бөгөөд 27 хувь нь 65-аас дээш насны хүн байжээ.

Харин Өмнөд Африкт бүртгэгдсэн коронавирусийн шинэ хувилбарт тус вакцин 60 хувийн эерэг нөлөө үзүүлээд байгаа аж.

“Новавакс” компанийн гүйцэтгэх захирал Стэн Эрк “Энэ бол бидний хүлээснээс ч илүү гайхалтай үр дүн. Тэр дундаа Өмнөд Африкт бүртгэгдсэн шинэ хувилбарт эерэг нөлөө үзүүлж буй нь сайн мэдээ” хэмээжээ.

Их Британид одоогийн байдлаар коронавирусийн эсрэг “АстраЗенека”, “Пфизер”, “Модерна” зэрэг вакциныг хүлээн зөвшөөрөөд байна.

Эх сурвалж: BBC