Израил Улсад вакцин хийлгэсэн 12 мянга гаруй иргэн коронавирусийн халдвар авчээ. Тодруулбал, АНУ, Германы хамтран үйлдвэрлэж буй “Пфизер” вакцины тунг тариулсан 12 мянга гаруй хүнээс коронавирусийн халдвар илэрсэн байна. Вакцинжуулалтад хамрагдсан ч коронавирусийн халдвар авсан иргэдийн 69 нь хоёр дахь тунгаа тариулж, вакцинжуулалтад бүрэн хамрагдсан бол үлдсэн хүмүүс ердөө эхний тунгаа тариулаад байжээ.

      Тус улс нь өнгөрсөн арванхоёрдугаар сарын 20-ноос бүх нийтийн вакцинжуулалтаа эхэлсэн. Улмаар нийт иргэдийнхээ 10 хувийг хамгийн богино хугацаанд вакцинжуулсан анхны орон болсон юм. Одоогоор Израил Улсад нийт 576 мянган иргэн халдвар авч, 4181 хүн нас бараад байна.