Баянгол дүүргийн 12 дугаар хорооны VI бичил хороололд байрлах 19 дүгээр байрны оршин суугчдаас коронавирусийн халдвар илэрсэн талаар бид өчигдөр мэдээлсэн. Иймд тус байрыг өчигдөр 17:00 цагийн орчимд хамгаалалтад авч, оршин суугчдыг тусгаарласан юм. 

Энэ талаар Баянгол дүүргийн 12 дугаар хорооны Засаг дарга н.Ганхуягаас тодруулахад “Тус байранд амьдардаг залуугаас халдвар илэрсэн юм билээ. Халдвар илэрсэн хүн нь “Монос” эмийн санд ажилладаг байсан гэсэн. Одоогийн байдлаар түүний гэр бүлийнхэн болон давхрынх нь хүмүүсийг тусгаарласан гэсэн” гэсэн бол албаны эх сурвалж "Тус байрны иргэдээс шинжилгээ авахад 10 хүнээс коронавирусийн халдвар илэрч, PCR шинжилгээний хариу эерэг гарсан" гэлээ.