Норвег Улсад "Pfizer", "BioNTech" компанийн хамтран үйлдвэрлэж байгаа вакцины тунг тариулсныхаа дараа нас барсан хоёр тохиолдол бүртгэгджээ. Тус улс эмзэг бүлгийн иргэдээ эхний ээлжинд вакцинд хамруулж буй бөгөөд нас барсан хоёр хүн Өндөр настны асрамжийн газрын өвчтөнүүд байсан юм.

       Энэ талаар Норвег Улсын Эмийн агентлагийн захирал Штайнер Мадсен “Вакцин үхлийн шалтгаан болов уу, аль эсвэл вакцин хийсний дараах гэнэтийн тохиолдол байсан эсэхийг судлах хэрэгтэй. Коронавирусийн вакцинжуулалтад эхний ээлжинд эмзэг бүлгийн иргэдийг хамруулж байгаа учраас санамсаргүй тохиолдлоор хорвоогийн мөнх бусыг үзүүлсэн байж болно” хэмээжээ.

       Нас баралтын шалтгааныг тус улсын Эмийн агентлаг болон Нийгмийн эрүүл мэндийн үндэсний хүрээлэнгээс үргэлжлүүлэн шалгаж байгаа аж.