ХСҮТ-ийн эмч Э.Эрхэмбаяр нь ходоодны хорт хавдрын хагалгаанд орох гэж буй өвчтөний ар гэрийнхнээс гурван сая төгрөг нэхэмжилсэн гэх мэдээлэл гараад буй. Энэ талаар тус төвийн эмч Э.Эрхэмбаяраас тодруулахад “Би мэдээлэл өгөхгүй. Гурван сая төгрөг нэхэмжилсэн зүйл байхгүй” хэмээн мэдээлэл өгөхөөс татгалзлаа. Харин энэ талаар ХСҮТ-ийн захирал Н.Эрдэнэхүүгээс тодрууллаа.
-Танай эмнэлгийн мэс заслын эмч Э.Эрхэмбаярыг үйлчлүүлэгчээсээ мөнгө нэхэмжилсэн гэх мэдээлэл цахим сайтуудаар гарсан. Ямар учиртай мөнгө нэхсэн юм бол. Ашиг сонирхлын зөрчил үнэхээр байсан юм уу?
-Ходоодны хорт хавдрын мэс засалд ороход 10 сая гаруй төгрөг шаардлагатай. Мэс заслын 25 хувийг хувь хүн өөрөө төлөх ёстой байдаг. Э.Эрхэмбаяр эмчийн нэхэмжилсэн гээд байгаа гурван сая төгрөг нь мэс заслын төлбөрийн 25 хувь байх гэж бид бодож байгаа.
-Мэс заслыг гурван эмч удирдах байсан юм билээ. Эмч эмчилгээний зардал нэхэмжлэх эрхтэй байдаг юм болов уу. Зарим эх сурвалж "Цахим бүртгэлийн ажилтан нь мөнгөө авдаг. Эмчид төлдөггүй" гэсэн байсан?
-Эмчилгээний зардал нэхсэн нь Э.Эрхэмбаяр эмчийн буруу. Хагалгааны дараа 25 хувийг үйлчлүүлэгч өөрөө тусгай дансанд төлөх ёстой. Гэтэл манай эмч хагалгаа хийхээс өмнө мөнгө нэхэмжилсэн байна лээ. Эмчилгээний зардлыг ямар ч эмч нэхэмжлэх ёсгүй бөгөөд үйлчлүүлэгч өөрөө цахим бүртгэл дээр төлөх ёстой. Харин “20 минутын дотор авч ир” гэж хэлсэн эсэхийг бид мэдэхгүй.
-Э.Эрхэмбаяр эмч буруугаа хүлээж, “Миний буруу” гэж хэлсэн гэсэн шүү дээ.
-Бидэнд ямар ч тайлбар, мэдээлэл өгөөгүй. “Миний буруу” гэхээс өөрөөр тайлбар хэлээгүй.
-Хариуцлага алдаж, цаашлаад хахууль авах гэж оролдсон байж болзошгүй эмчид эмнэлгийн удирдлагууд сануулах арга хэмжээ авах нь хэр зохистой вэ?
-Уг нь манай Э.Эрхэмбаяр эмч төлөв, даруу зантай. Яагаад тийм үйлдэл гаргасныг нь үнэхээр мэдэхгүй. Бид Э.Эрхэмбаяр эмчид үйлчлүүлэгчдээ зөв мэдээлэл өгөөгүй, ёс зүйн дүрэм зөрчсөн, мөнгө нэхэмжлэх ёсгүй байж мөнгө ярьсан гэдэг үндэслэлээр сануулах арга хэмжээ авсан. Хэрэв хахууль авсан нь тогтоогдсон бол эмчийг ажлаас халах хүртэл арга хэмжээ авах байсан. Бид гэхдээ хахууль авах гэж оролдсон эсэхийг тогтоох боломж байхгүй.
ХСҮТ-ийн захирал Н.ЭРДЭНЭХҮҮ: Э.Эрхэмбаяр эмч хахууль авсан нь тогтоогдсон бол ажлаас нь халах байсан |
|
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц |
7509-1188 |