Зам тээврийн ноцтой осол гарч, хоёр хүний амь эрсэдсэн харамсалтай хэрэг гараад байна. Тодруулбал, Нийтийн тээврийн парк шинэчлэлийн хүрээнд Замын-Үүдээс Улаанбаатар руу зорчиж явсан 25 автобусны нэг “Альфард” маркийн автомашинтай мөргөлдөж, зорчигчид амиа алджээ. Мөн автобусны жолоочийн биеийн байдал хүнд байгаа аж.

           Уг харамсалтай ослын талаар ЦЕГ-ын Хэвлэл мэдээллийн төвөөс өгсөн мэдээллээр “Цагдаагийн байгууллагад нэгдүгээр сарын 20-нд Дорноговь аймгийн Замын-Үүд сумаас Улаанбаатарын чиглэлд зорчиж явсан зургадугаар ээлжийн 25 автобустай хоёр дахь цувааны нэг автобус 167 дахь км заалтад осолдож, хүний амь эрсэдсэн тухай дуудлага ирсэн. Урьдчилсан байдлаар цуваагаар зорчиж байсан долоон номерын автобус, Альфард маркийн тээврийн хэрэгсэлтэй мөргөлдөж, суудлын автомашины хоёр зорчигч амь хохирсон. Цагдаагийн газраас ослын шалтгаан нөхцөлийг тогтоох, бусад шалгалтын ажиллагааг явуулж байна. Орон нутгийн замын нөхцөл байдал цастай, хальтаргаатай, үзэгдэх орчин муу, авто зам болон дугуй барьцалдах чадвар муудсан, зарим үед цаг агаарын нөхцөл байдлаас хамаарч тээврийн хэрэгсэл зорчиход хүндрэлтэй байхад хурд хэтрүүлэн өөртөө болон бусдад эрсдэл үүсгэх тохиолдол цөөнгүй байна. Иймд хөдөө орон нутгийн замд иргэд, жолооч та бүхэн зорчихдоо өөрийн болон бусдын аюулгүй байдлыг ханган зөвшөөрөгдсөн хурдыг баримталж, гүйцэж түрүүлэх, саадыг тойрон гарахдаа бусдад осолтой нөхцөл үүсгэхгүй байх, нөхцөл бүрдсэний дараа үйлдэл хийхийг цагдаагийн байгууллагаас онцгойлон сэрэмжлүүлж байна” гэлээ.

Тэгвэл бид автобустай мөргөлдсөн “Альфард” маркийн автомашины жолооч Д-той холбогдож, ослын талаар дараах мэдээллийн авлаа. Тэрбээр Дорноговь аймгийн Нэгдсэн эмнэлэгт биеийн байдал нь хүндэвтэр, хэвтэн эмчлүүлж байгаа юм.

-Таны биеийн байдал ямар байна вэ. Эмчилгээ хийлгэж байна уу?

        -Хоёр зорчигч маань амиа алдсан харамсалтай осол боллоо. Ослын улмаас миний биеийн байдал хүндэвтэр, толгой, тархи, хөл, гараад өвдөөд байгаа. Ийм учраас өчигдөр аймгийнхаа Нэгдсэн эмнэлгийн Гэмтлийн тасагт хэвтэн эмчлүүлж байна. Биеийн байдал өчигдөр (уржигдар) гайгүй байсан ч өнөөдөр (өчигдөр) янгинаад, босож, суухад хүндрэлтэй болчихлоо.

-Машиндаа хэдэн зорчигчтой явж байсан юм бэ?

        -Бид нэгдүгээр сарын 20-ны 05:00 цагт Улаанбаатараас Замын-Үүд чиглэлд хөдөлсөн. Нэгдүгээр сарын 19-ний орой нэг залуу залгаад “Дөрвүүлээ байна. Замын-Үүд явах гэсэн юм аа” л гэж хэлсэн. Тэгээд тэр дөрвийг аваад л замд гарсан. Харамсалтай нь, цэл залуухан залуучуудыг замдаа алдчихлаа. Итгэж чадахгүй, ар гэрийнхнийг нь бодохоор зүрх шимшрээд, сэтгэл санаа хүнд байна. Амьд үлдсэн хоёр залуу нь Дорноговь аймгийн Нэгдсэн эмнэлэгт хэвтэн эмчлүүлж байгаа гэсэн. Бид явж чадахгүй болохоор хоорондоо уулзаж чадаагүй байна. Ар гэрийнхэнтэй манай эгч уулзсан гэж байна лээ. Нүд ирмэхийн зуурт л машин маань хоёр хуваагдаад, хоёр хүний амь эрсдчихлээ.

 -Осол болох үед юу болсон талаар та яриад өгч болох уу. Та цуваанд явсан автобусыг гүйцэж түрүүлсэн юм уу?

          -Би чинь Улаанбаатараас Замын-Үүд чиглэлд явсан шүү дээ. Харин автобуснууд Замын-Үүдээс Улаанбаатар чиглэлд зорчиж явсан. Цагдаагийн хамгаалалт аваад, цуваа үүсгээд явж байсан гэдгийг хүмүүс ойлгох хэрэгтэй. Би юу гэж цуваагаар явж байгаа машины урдуур орох юм бэ. Би гүйцэж түрүүлэх үйлдэл, хөдөлгөөн хийгээгүй. Зөвхөн өөрийнхөө зорчих эгнээгээр л зорчиж явсан. Осол Дорноговь аймгаас 45 км-ийн зайд болсон. Гурван тийшээ салдаг замын уулзвараас ердөө 200 метрийн зайд, 12:00 цагийн үед осол болсон. Зам салдаг хэсэг дээр би зогсож байгаа нөгөө урсгалыг машиныг өнгөрөөсөн. Тэгээд хөдлөөд замдаа ороод явж байтал автобуснууд өнгөрч, зургаа дахь автобус нь цас манан татаад явчихсан. Зам халтиргаа ихтэй, цасан шуурга болсон байсан шүү дээ. Тэгээд зургаа дахь автобусны цас, манан арилж амжаагүй байтал долоо дахь автобус нь урдаас ороод ирсэн. Гэнэтхэн л урсгал сөрж орж ирээд, машиныг минь хуваагаад хаячихсан.

Би баруун дарсан, миний талын хоёр дугуй шороон зам дээр гарсан, тэгээд урдаас том хар юм ороод ирсэн. Автобусны жолооч цуваагаар явж байгаа бол цуваандаа л явах хэрэгтэй.

     Яг юунаас болоод эсрэг талын урсгалд орж ирээд манай машиныг мөргөснийг мэдэхгүй. Цагдаагийн байгууллагаас тогтоогоод өгнө биз дээ. Би үнэхээр сэтгэл санааны хямралд орж, хоёр залуугийн араас гашуудаж байна. Надад итгээд суусан дөрвөн найзын хоёр нь байхгүй, хоёр нь эмнэлэгт хэвтэж байна шүү дээ. Итгэхэд ч бэрх, хэцүү байна. Тэд урагшаа хил гарч, сургалтад суухаар явж байсан. Өөр нарийн ширийн зүйлийг мэдэхгүй байна. Жолоочийн эсрэг талд сууж явсан залуу, түүний ард харалдаа сууж явсан залуу бурхан болсон. Автобус жолоочийн эсрэг талыг хамаад гарсан. Ямар ч хүн амьд үлдэх боломж байгаагүй. Автобусны жолооч ч гэсэн бие нь хүнд байгаа байх. Маш аймшигтай осол болсон шүү дээ.

-Та цагдаагийн байгууллагад мэдүүлэг өгсөн үү?

           -Өгөөгүй байгаа. Аймгийн цагдаагийн газраас ирж мэдүүлэг өг гэж байна лээ. Би өмгөөлөгчтэй өгнө гээд одоогоор очоогүй байна. Талийгаачдын ар гэрийнхэнтэй мөн уулзаж чадаагүй байна. Тэд Дорноговьд ирээд хүмүүсээ аваад явсан гэсэн. Тэдэнд л санаа зовж байна. Мэдүүлэг өгөх, цагдаад байцаагдах ч яах вэ, цаг нь болохоор болох асуудал биз дээ.

-Таны машин хаана байгаа вэ?

         -Миний машин журмын хашаанд байгаа гэсэн. Машин ч гэж дээ, төмрийн сэг болсон байна лээ. Харин осол гарсан автобус компанийн хашаанд байна гэсэн. Цагдаагийн албан хаагчид энэ хэргийг үнэн зөвөөр тогтоогоод өгнө гэдэгт итгэж байна. Бусдаар ч цахим сүлжээнд такси үйлчилгээ эрхэлдэг биднийг л буруутгасан байна лээ. “Альфард”-ын жолоочийн буруу, цувааг гүйцэж түрүүлэх гэлээ” гээд бичсэн байсан. Тийм зүйл болоогүй гэдгийг дахин хэлмээр байна. 20 гаруй автобустай цувааг гүйцэж түрүүлдэг жолооч бараг л байхгүй болов уу.

-Хамгаалалт аваад явж байсан цагдаагийн машин таныг зогс гэээгүй юу?

              -Салдаг хэсгээс ороход цагдаагийн машин намайг зогс гээгүй. “Цуваа явж байна. Хөдөлгөөн үйлдэхгүй зогсож бай” гэсэн бол бид зогсож л байна. Хэн ч тийм зүйл хэлээгүй, хөдөлгөөн хэвийн үргэлжилж байсан шүү дээ.

-Танд өөр нэмж хэлэх зүйл байна уу?

              -Амиа алдсан хоёр залуугийн ар гэрээс л уучлалт хүсмээр байна. Үнэхээр ноцтой осол болж, хоёр сайхан залуу амиа алдлаа. Үүнд их харамсаж байна. Замын халтиргаа гулгаа асар хүнд байна даа. Өөр ч надад хэлэх юм алга.