Тусгай хэрэгцээт 29 дүгээр сургуулийн технологийн багш н.Бат-Эрдэнэ өчигдөр "Сургуулийн захирал намайг хууль бусаар халсан" хэмээн мэдээлэл хийсэн. Тэгвэл бид тус сургуулийн захирал Д.Оюунсувдаас юу болсон талаар тодрууллаа.
-Танай сургуулийн технологийн багш өчигдөр "Манай захирал намайг хууль бусаар ажлаас халсан" хэмээн мэдээлэл хийсэн. Ямар учраас тэр багшийг ажлаас нь халах болсон юм бэ?
-Манай сургуульд технологийн багшаар ажиллаж байсан н.Бат-Эрдэнэ багшийн хувьд нэгдүгээрт, 2018 онд актлагдсан ч хэвийн ажиллаж байсан технологийн кабинетын хөрөө харуулын суурь машин, цахилгаан өрөм, төмрийн токерын машин, цахилгаан хөдөлгүүр гээд томоохон тоног төхөөрөмжүүд мөн хажуу ангид нь байсан тоног, төхөөрөмжүүдийг дур мэдэн, хууль бусаар зарсан. Сургуулийн, улсын өмчийг акталсан ч зарах боломжтой бол хэдэн төгрөгөөр зарж болох тухай үнэлгээг Захиргааны хурлаар хэлэлцэн тогтоодог. Тэгээд зарсан бол төлбөр нь сургуулийн орлого болдог журам, дүрэмтэй. Гэтэл сургуулийн өмчийг дур мэдэн зарчихаад нэг төгрөг ч сургуульд өгөөгүй. Бат-Эрдэнэ багшаас “Акталсан зүйлсээ хэдэн төгрөгөөр зарсан бэ” гэтэл "100 айлын нэг хүнд 700 мянган төгрөгөөр өгсөн" гэж хэлсэн. Тэгэхээр нь "Сургуулийн данс руу төлбөрийг нь хийгээрэй" гэхэд хийхгүйгээр барахгүй бямба гарагт, амралтын өдрөөр хэний ч зөвшөөрөлгүйгээр ачаад аваад явсан байгаа юм. Харзнаж байтал нийлээд 500 гаруй мянган төгрөг болох хоёр зарлагын баримт авчирч өгсөн. "Мөнгөө санхүүд тушаа" гэтэл “Тэгж байгаад би бүх тооцоогоо өөрт чинь өгнө” гэж байгаа юм. Би авах эрхгүй, шаардлагагүй шүү дээ.
-Энэ асуудлаас үүдэж, багшийг ажлаас нь чөлөөлсөн юм уу?
-Технологийн кабинетын юмнуудыг дур мэдэн зарсан явдал бол эхний асуудал. Хоёрдугаарт, энэ хүн бүтэн жил өрөөндөө засвар хийж байгаа нэртэй хичээл орохгүй, хүүхдүүдийн сурах эрхийг зөрчиж явсан. Хүүхэд нэгдүгээрт байх ёстой. Тэр тусмаа манай сургуулийн хувьд хүүхэд сурч боловсрох эрхтэй. Гэтэл Бат-Эрдэнэ багш сурах орчинд нь анхаарч байгаа нь гээд ангийг цоожлоод хүүхдүүдэд хичээл заахаа больсон. Дээрээс нь хичээлээ тасладаг. Дараалан хоёр, гурван хоног хичээлээ таслаад алга болчихдог. Тэгээд захирлын дэргэдэх хурлаар оруулж, менежер түүнд ажлаа хийхийг нь удаа дараа сануулж, зөвлөсөн. Гэтэл хамгийн сүүлд гэхэд л саяхан ажлаа зургаа хоног тасласан байсан. Мөн багшийн хөтлөх ёстой, багшийн үнэт цаас гэж явдаг хичээлийн журнал дээр нэг ч хөтлөлт хийдэггүй. Дүн гарахад цаасан журнал хамгийн чухал байдаг. Гэтэл жилийн эцэс дуусаж байхад багш журналаа нэг ч хөтлөөгүй. Би хоёр удаа шалгахад “Ангидаа засвар хийгээд зав болсонгүй” гэж хариулсан. Багшийн цалин, урамшууллаа авах гол бичиг баримт нь журнал шүү дээ. Сургалтын хөтөлбөр, төлөвлөгөөг нь үзэхэд МСҮТ-ийн хөтөлбөр, төлөвлөгөө байсан. Манай сургуулийн хөтөлбөр, төлөвлөгөө биш гэсэн үг.
-Та багштайгаа уулзаж, ярилцаж, нөхцөл байдлыг нь хэлж байсан уу?
-Өөрт нь нөхцөл байдлыг нь хэлээд, яагаад ийм байдалтай ажиллаад байгааг нь асуухад “Танд ямар хамаатай юм” гэдэг хариулт хэлсэн. Бат-Эрдэнэ багш түр чөлөө авсан хүний оронд ажиллаж байсан юм. Үүнээс гадна тэр удаа дараа хүүхэд зодсон. Ингээд түүнийг Хөдөлмөрийн хууль болон Дотоод журмын дагуу хурлаар оруулаад, ажлаас нь чөлөөлсөн. Бат-Эрдэнэ багшид би өмнө нь удаа дараа сануулсан. Гэтэл нэг ч удаа алдаа дутагдлаа засъя гэж бодоогүй, харин ч эсрэгээрээ улам бүр ёс зүйгүй үйлдэл гаргасаар ирсэн учир түүнийг ажлаас нь чөлөөлөхөөс өөр сонголт байгаагүй.
| 29 ДҮГЭЭР СУРГУУЛИЙН ЗАХИРАЛ Д.ОЮУНСУВД: Ажлаас халагдсан багш сургуулийн техник, эд зүйлийг зөвшөөрөлгүй зарж, удаа дараа сурагч зодсон зэрэг зөрчилтэй байсан |
|
