Манай улсад сүүлийн жилүүдэд эрчимтэй хөгжиж буй урлагийн нэг төрөл бол цаасан сийлбэр билээ. Цаасан сийлбэр урлаг нь Хятадын Хань үндэстний хамгийн эртний урлаг бөгөөд, өдгөө дэлхийн хэмжээний урлаг болон хөгжсөн.

 “Цаасан сийлбэрээр хүний хөргийг "амилуулахдаа", дотоод мөн чанарыг нь ойлгохыг хичээдэг” хэмээн ярих залуу уран бүтээлч Э.Номинзулыг та бүхэндээ танилцуулж байна. Түүний дотроо цэцэг шиг ургуулан төсөөлж, хүсэл, бодол ханасан цагтаа туурвисан чөлөөт сэтгэлгээний бүтээлүүд нь цөөнгүй хүний сэтгэл зүрхний орон зайд аль хэдийн байраа олж эхэлжээ. Зөөлхөн дуугаар аядуухан ярьж, намбалагаар инээмсэглэн суух багш, судлаач, туурвигч гоо бүсгүйн ертөнцөөр хэсэгхэн хугацаанд аялцгаая.