Тэр Содбаярын арыг дааж, “гар”-ыг нь бохир зүйлд дүрүүлэхгүй байх үүрэгтэй. Итгэлийн хувьд бүх зүйл хуулийн дагуу, дараа нь ямар нэгэн асуудал дагуулахгүй байх ёстой. Тэр ийм зарчимтай гэдгээ гуравдугаар анги дээр сайн харуулсан. “Газраа зарчих бид үнийг нь нугалаад өгье, Манлай ахаа танд муу юм болохоос өмнө гэрээнд гарын үсгээ зурчих” гэж тэр олон гуйсан. Тулга ирээд “Заавал ингэж үйлээ үзэх хэрэг байдаг юм уу” гэхэд “Дараа нь үүсэх эрсдэлээс сэргийлж байна” гэж хэлэхдээ тэр өөрийгөө үзэл бодолдоо үнэнч гэдгээ баталж байлаа.

                “Гарц” олон ангит киноны “DH” группын өв залгамжлагч Содбаярын хуулийн зөвлөх, итгэл даасан туслах Итгэлийн дүрд ажилласан жүжигчин Э.Насанбаттай ярилцлаа. Тэрбээр өмнө нь “Зүрхэн зүг”, “Зура”, “Асрагч” тэргүүтэй уран бүтээлээрээ та бүхэнтэй уулзаж байсан билээ.

-Танд энэ өдрийн мэнд хүргэе. “Гарц” олон ангит кино үзэгчдээс эерэг үнэлгээ авсаар байна. Уран бүтээлчийн хувьд сэтгэгдэл өндөр байгаа болов уу?

                -“Гарц” олон ангит киноны зохиолыг найруулагч А.Нямцэрэн, Б.Саруулбуян хоёр маань бичсэн. Олон хүний хамтын хичээл зүтгэлэр уран бүтээл бий болж, үзэгчдийн хүртээл болж байгаад баяртай байна. Уран бүтээлчийн хувиар үзэгчдийн сэтгэлд хүрч, бидний киног хүлээлт тавин үзэж байгаад үнэхээр баяртай байна. Мэдээж шүүмжлэлүүд ч ирж байгаа. Тэр бүгдийг бид эергээр хүлээн авч, дараа дараагийн уран бүтээл дээрээ засаж ажиллахыг хичээх болно.

-Итгэлийн дүрийг хэрхэн төсөөлж байсан бэ. Төсөөлснөө гаргах амаргүй байсан уу?

                -Анх “Фалко” энтертайнментаас холбогдож энэ киноны Итгэл гэх дүр дээр ажиллах санал тавьсан. Зохиолоо уншаад л шууд таалагдсан. Бодож санасандаа хүртэл ажилласан гэж бодохгүй байгаа. Бүх уран бүтээлчдэд эргээд киногоо үзэхдээ “Энэ хэсэг дээр нэг ингээд хэлсэн бол, энэ хэсэгт ингэж жүжиглэсэн бол” гэж харамсах зүйл олон байдаг байх.  Нуулгүй хэлэхэд би ч киногоо үзээд харамссан зүйлүүд байсан. Гэхдээ бодож төсөөлөхийнхнөө ядаж 70 хувийг биелүүлж ажилласан байх гэж өөрийгөө урамшуулж байгаа.

-Үзэгчдийн хувьд Итгэл бүх зүйлийг хуулийн дагуу, хүчирхийлэлгүйгээр шийдэхийг хүсдэг нэгэн шиг санагдсан. Таны олж харснаар Итгэлийн мөн чанар юу юм бэ?

                -Итгэл бол “DH” группын өв залгамжлагч Содбаярын хуулийн зөвлөх. DH группын тэтгэлгээр хууль зүйн чиглэлээр суралцаж эх орондоо ирээд шууд Содбаярын хуулийн асуудлыг даан ажиллаж байгаа залуугийн дүр. Мэдээж хүчирхийлэл гэдэг хүсэх юм биш, эргээд хүчирхийлэл нь хуулийнхаа хүрээнд хэзээ ч сайн үр дагавар үзүүлэхгүй учир Итгэл аль болох эхлээд хуулийн хүрээнд асуудлыг шийдэхийг хүснэ. Хорвоо ямар хүний хүслээр болох биш, яах аргагүй хүчээр шийдэх үе олон гарч байгааг түүний дүр тод харуулдаг. Миний хувьд Итгэлийг үнэнч залуу гэж харсан. Эерэг талд ч бай, эсрэг талд ч бай хамаагүй үзэл бодолдоо үнэнч дүрийг харуулсан гэж бодож байна.

-Олон ангит кинонд ажиллах уран бүтээлчээс их чадвар, тэвчээр шаарддаг байх?

                -“Гарц” олон ангит кино маань 2023 оны аравдугаар сард зураг авалтаа эхэлсэн. 2024 оны дөрөвдүгээр сард зураг авалт дууссан гэхээр нийт  зургаан сарын хугацааг зураг авалтад зориулсан бүтээл. Би бол жүжигчид  гэхээсээ илүү киноны арын албаныхандаа л баярлаж явдаг. Энэ олон сарын хугацаанд тасралтгүй ажиллаж байгаа хүмүүсийн хувьд маш их тэсвэр тэвчээр шаардсан нь ойлгомжтой. Шантрах үеүд ч маш олон байсан байх. Тэр болгоныг өнгөрүүлж тасралтгүй ажилласан найруулагчийн баг, зураглаачийн баг, зураачийн баг, хувцас, нүүр хувиргалтынхан болон “Фалко” энтертайнментын захирал продюсер Д.Энхсүх найзаараа маш их бахархсандаа. Би бол зураг авалттай үедээ ирээд л зургандаа ороод бусад үед нь амарч байсан хүн. Ядарсан гэж кино багийнхныхаа хажууд хэлэхээс ч санаа зовно шүү дээ. Маш мундаг залуучууд нэг зорилготой нэгдэн зүтгэж өнөөдрийн “Гарц” киног үзэгч олондоо хүргэж байна даа.

-Өмгөөлөгчийн дүрд ажилласан шүү дээ. Дүрийн судалгаагаа хэрхэн хийсэн бэ?

                -Өмнө нь цэрэг, цагдаагийн дүрүүд дээр ажиллаж байсан ч яг хуульчийн дүр дээр ажиллаж үзээгүй юм билээ. Итгэлийн дүр дээр сонгогдсоноосоо хойш хэд хэдэн хуульчидтай уулзаж ажил мэргэжлийг нь сонирхож, судалсан. Энгийн үед хэрхэн биеэ авч явдаг, яаж хувцасладаг, хуулийн зөвлөгөө өгөхдөө хэрхэн, хаанаас ярьж эхэлж байна гээд л өөрийнхөө хэмжээнд судалсан. Ер нь их аядуу зөөлөн ярьсан, даруу төлөв хүмүүс байдаг юм билээ.

-Яагаад жүжигчин болохоор шийдсэн юм бэ?

                -Анх 13 настайдаа Япон Монголын хамтарсан “Чингис хаан” кинонд Өгөөдэй хааны бага насанд тоглож байсан. Аав ээж маань маш их дэмждэг байсан. Энэ бүхэн намайг жүжигчин болоход нөлөөлсөн.

-Өмнө нь “Зүрхэн зүг” уран сайхны киноны гол дүрд ажиллаж байсан шүү дээ. Тус уран бүтээлийнхээ талаар ярихгүй юу. Анхны уран бүтээл байсан уу?

                -“Warm pictures”-ийн ерөнхий найруулагч Б.Баянмөнх ах холбогдож "Зүрхэн зүг" киноны дэд хурандаа Сэд гэх залуугийн дүрд ажиллах санал тавьсан. Зохиолоо бүрэн уншиж амжихгүй хэрнээ л зөвшөөрсөн. “Зүрхэн зүг” кино Киргиз Улсад зохион байгуулагддаг “АК ИЛБИРС” буюу “Ирвэс” олон улсын кино наадмаас Монгол Улсаас анх удаа Төв Азийн шилдэг кино гэх цомын эзэн болсон . Тэнд суугаа Элчин сайдын яамныхан очиж шагнал гардаж авсан. Одоо харин цом нь онгоцоор ирж байгаа гэсэн. “Зүрхэн зүг” киноныхоо нийт уран бүтээлчдэд халуун баяр хүргэх нь зүйтэй болов уу.

-“Гарц” олон ангит кинонд залуу уран бүтээлчид түлхүү ажилласан байсан. Кино багийнхаа талаар ярихгүй юу?

                - Ёстой шижигнэсэн сайхан залуучуудтай хамт ажилласан. Үнэхээр баяртай байгаа. Бидэнд жүжигчин Б.Одончимэг эгч, Э.Тодгэрэл ах хоёр хамгийн их зөвлөж, тусалж ажилласан. Тэднээсээ их зүйл сурсан. Мундаг уран бүтээлчидтэйгээ ойр ажиллах түшигтэй, сайхан байлаа. Жүжигчин Э.Тодгэрэл ах манай яг дээд дамжааны оюутан байсан болохоор одоо болтол ахаа гэж хүндэлдэг. Хамгийн ачаалалтай ажилласан жүжигчид бол ах, дүүсийн дүрийг бүтээсэн залуус.  Тэр дундаа жүжигчин Ц.Давааням Т.Оюунболд О.Анхсүх гурав байсан. Найзуудыгаа хааяа өрөвдсөн шүү. Гэхдээ сонгосон мэргэжилдээ дуртай хүсэл мөрөөдлөө биелүүлж яваа залуус учраас шантрахгүй, зүтгэсээр уран бүтээлийнхээ ард амжилттай гарсан. Хүнд хэцүү зураг авалт олон байсан шүү. Гэхдээ л бид даваад ард нь гарсан байна. Кино багийнхныгаа хүндэлж, хайрлаж явдаг. Найруулагч Б.Саруулбуян сайн кино баг бүрдүүлж ажилласан гэж бодож байгаа.

-Ирээдүйд ямар дүр бүтээх юм сан гэж боддог вэ?

                -Дүр намайг голохгүй бол би ямар ч дүр байсан чадахаараа ажиллана гэж боддог. Олон уран бүтээлч ах эгч, найз нөхөд, дүү нартай хамтарч ажиллах тусам эргээд надад маш үнэтэй туршлага бодог болохоор ямар ч дүр дээр ажиллахад бэлэн байна. Мэдээж жүжигчин болгонд тоглохыг зорьдог дүр бий. Би түүхэн кинонд дүрд ажиллах юм сан гэж боддог.

-Адал явдал, зодоонтой кинонд тоглох ямар байв. Танаас ямар ур чадварыг шаарсан бэ?

                -“Гарц” бол аction ,thriller төрлийн кино. Тэр утгаараа үзэгчдийг уйдаахгүй, сонирхолтой байгаа болов уу гэж итгэж байна. Тулаантай хэсгүүд дээр жүжиглэж байгаа бид хүртэл огшоод, "тулалдмаар" санагдах үе байсан. Найруулагч хүртэл намайг “Чи хуулийн хүн шүү дээ” гэнэ. Нээрээ л хуулийн хүмүүс юу юугүй зодолдож тэмцэлдэхгүй шүү дээ. Гэхдээ хүсэл, зорилгыг минь найруулагч мэдэрч, хэд хэдэн тулааны сценд оруулсан.

-“Гарц” киногоор юуг илэрхийлэхийг хүссэн бол. Таны хувьд тус киног сонгож үзэх шалтгаан хэлээч гэвэл ямар шалтгаан хэлэх вэ?

                -“Гарц” олон ангит кино одоогийн нийгмийн толь гэж бодож байгаа. Эх орон минь үгээр хэлэмгүй сайхан нутаг. Гэхдээ үнэхээр болохгүй, бүтэхгүй бэрх зүйл олон байна. Хүчтэй нь хүчгүйгээ, баян нь ядуугаа дээрэлхдэг нийгэмд амьдарч байгаа юм шиг санагдах үе бий. Тиймээс залуу хүний хувьд “Гарц киног нийгэм рүү чиглэсэн цээжин дэх багтраа, түүнийгээ уран сайхнаар илэрхийлж байгаа нэг үзэл хандлага гэж харж байгаа. Хэдий кино ч гэсэн бодит байдлаас төдийлөн хол зөрөхгүй.  Мөнгө л байвал Монголд үхлээс бусдаар юуг ч аргалж болдог болсон юм шиг санагддаг. Хүний амьдрал таашгүй шүү дээ. Бидэнд маргааш гэдэг өдөр байгаа үгүйг ч мэдэхгүй амьдарч байж, эд хөрөнгө, эрх мэдлийн араас амиа хайрлахгүй зүтгэж байдаг. Залуучууд хэрсүү мөнгө биш мэдлэгийг үнэлдэг цаг ирж байна. Тун удахгүй сайхан ирээдүй ирнэ гэдэгт итгэдэг. 

-Таны дараагийн зорилго, төлөвлөгөө юу вэ?

-Гурван бүрэн хэмжээний киноны санал ирсэн. Гол болон туслах дүрүүд дээр ажиллана. Зохиолтойгоо танилцаж үзээд боломжтой бол бүгдэд нь ажиллах хүсэлтэй байна даа.

-Ярилцлага өгсөн танд баярлалаа.

                -Баярлалаа.