Ард түмний штабын тэргүүн, Хан-Уул дүүргийн ИТХ-ын төлөөлөгч Б.Жагар Жилийн гурван хувийн хүүтэй зээлийг эздэд нь хүргэх тухай шаардлагыг Монгол Улсын Ерөнхий сайд Л.Оюун-Эрдэнэд өнгөрсөн гуравдугаар сарын 2, 18-ны өдрүүдэд хүргэсэн. Үүнтэй холбоотойгоор Б.Жагар өчигдөр Засгийн газрын ордны баруун хаалганы дэргэд суулт зарлаад байхад нь цагдаагийн байгууллагынхан Сүхбаатар дүүргийн цагдаагийн I хэлтэс рүү авч явсан байна. Цахим сүлжээнд "Хан-Уул дүүргийн ИТХ-ын төлөөлөгч Б.Жагарыг цагдаагийн байгууллагынхан баривчилсан" хэмээн бухимдалтай хандаж байгаа. Тэгвэл энэ талаар ЦЕГ-ын Хэвлэл мэдээллийн төвийн дарга, дэд хурандаа Б.Баатархүүгээс тодрууллаа. Тэрбээр

“Энэ нь баривчилгаа биш. Засгийн газраас гамшгийн үеийн нөхцөл байдалтай холбоотойгоор жагсаал, цуглаан зохион байгуулахыг хориглосон. Харин үүнтэй холбоотойгоор Хан-Уул дүүргийн ИТХ-ын төлөөлөгч Б.Жагарыг Сүхбаатар дүүргийн цагдаагийн I хэлтэст аваачиж, мэдүүлэг аваад явуулсан” гэв.