Газар хөдлөлтийн төв цэг нь Хөвсгөл аймгийн Ханх сумын Хачмын ам, Хөвсгөл нуурын ойролцоо байжээ. Ханх сумын Хачмын ам гэх газрын ойролцоо өвөлжиж байгаа айлуудын малын хашаа, зуны байшин нь нурсан байна. Нөхцөл байдлын талаар Ханх сумын малчин С.Ренчингээс талаар тодрууллаа.

-Танай өвөлжөөний ойролцоо газар хүчтэй хөдөлжээ. Та болон танай гэрийнхэн, мал хуй нь зүгээр үү.  Юу болсон талаар мэдээлэл өгөхгүй юү?

-Энд үүрээр аюул боллоо. Тэнгэр ниргэж байгаа юм шиг дуу гарч, байшин, хашаа тачигнаад сүйд болсон. Малын хашаа нурж, байшин маань нурахад бэлэн болоод байна. Үүрээр 05:10 цагт ор дайвалзаад, гэрийн эд хогшил бүгд нурж, эвдэрсэн. Муухай хашхираад гэрт байсан хөгшнөө дарж аваад, доошоо хэвтэхэд ашгүй байшин нуралгүй өнгөрлөө. Аяга, шанага хуйгаараа хагарч, хананд өлгөөтэй жааз, шилэн эдлэл унаж, хагарсан. Гэрт ер нь бүрэн бүтэн зүйл бараг алга, зурагт хүртэл хагарсан.

-Та хоёр бэртэж, гэмтээгүй биз дээ?

-Гайгүй ээ. Бид хоёр тухайн үед унтаж байсан юм. Гэнэт тачигнаад эхлэхээр нь орон доогуураа ороод, доошоо хараад хэвтсэн. Тэгээд чичирхийлэл бага зэрэг буурахаар нь гэрээсээ гарсан. Чичирхийлэл нь буурсан хэдий ч одоо хүртэл үе үе газар хөдөлсөөр байна. Малын хашаан дотор байсан үхэрнүүд мөөрөлдөж, хашаанаасаа гарсан байна лээ.

-Газар хагарч, ангайсан уу?

-Тийм ээ, газар энд, тэндгүй ангайж, хагарсан. Хэсэг хэсэг газарт дөрвөлжилж хагарсан байна лээ. Манайх голын ойролцоо байдаг болохоор ангайсан газраар ус их гарч ирсэн.