Сүхбаатарын талбайд залуус үнийн өсөлтийг эсэргүүцэн жагсаал зохион байгуулж байгаа. Өнгөрсөн шөнө дөрөвдүгээр сарын 7-8-нд шилжих шөнө жагсагчдыг тараахын тулд цагдаагийн алба хаагчид хүч ашиглаж, 67 иргэнийг саатуулаад байгаа аж.

             Тэгвэл өчигдөр болсон эсэргүүцлийн жагсаалд оролцсон иргэн А-гийн гэрт нэгжлэг хийж, мэдүүлэг авсан байна. Энэ талаар иргэн А “Өнөө өглөөний 08:00 цагийн үед Сүхбаатар дүүргийн цагдаагийн I хэлтсээс над руу залгаж, “Ирж мэдүүлэг өг” гэсэн. Тухайн үед намайг гэртээ байгаагүй байхад манай гэрт гурван цагдаа очиж, нэгжлэг хийж, над руу залгасан.

Надаас олны танил хүн гэдэг утгаараа залуусыг уриалан дуудсан байж болзошгүй гэх үндэслэлээр мэдүүлэг авсан. Одоо Сүхбаатар дүүргийн цагдаагийн I хэлтэст маш олон залуугаас мэдүүлэг авч байна. Ингэхдээ цагдаа нар “Та нарыг тарснаас хойш 10 гаруй цагдаагийн алба хаагч нүдээ сохлуулж, бэртэж, гэмтсэн” гэх тайлбар өгсөн” гэв.