Цахим сүлжээнд “4403 ...” улсын бүртгэлийн дугаартай тээврийн автомашины жолооч голын усанд дизель түлш асгаж буй гэрэл зураг олон нийтийн шүүмжлэлд өртөөд байгаа. Тус гэрэл зургийг Дорнод аймгийн цахим сүлжээнд “Хэрлэн голыг минь бохирдууллаа” гэх тайлбартай нийтэлжээ.

Харин эх сурвалжийн мэдээлснээр Хэрлэн гол мөн эсэхийг нь тогтоогүй байгаа гэнэ. Мөн тухайн тээврийн хэрэгслийн улсын бүртгэлийн дугаар нь тод харагдахгүй байгаа учир мөрдлөгийн явцад хүндрэл учруулж байх магадлалтай аж.

       Энэ талаар Дорнод аймгийн Цагдаагийн газрын Нийтийн хэв журам хамгаалах хэлтсийн хэсгийн байцаагч Э.Баасанжаваас тодруулахад “Цахим орчинд тарсан зураг, зөрчилтэй холбогдох шалгалтын ажиллагаа явуулах үүрэг чиглэл удирдлагаас авсан. Одоогоор Хэрлэн голын орчим газар нутаг мөн эсэх талаар тогтоохоор хяналт, шалгалтын ажиллагаа үргэлжилж байна. Үүнээс өөр дэлгэрэнгүй мэдээлэл өгөх боломжгүй” гэв.