“Херо энтертайнмент”-ийн найруулагч Б.Баатараас цаг үеийн асуудлаар зарим зүйлийг тодрууллаа.
-Сүүлийн үед “Херо” энтертайнмент их “чимээгүй” байх шиг?
-Манай энтертайнментын залуус үйл ажиллагаагаа хэвийн явуулж, реклам, клип, баримтад кино хийж байгаа.
-Та улс төрийн өндөр дээд албан тушаалтнуудтай ойр ажилладаг. Тэр дундаа төрийн гурван өндөрлөгтэй нэлээд дотно гэгддэг. Сүүлийн үед Ерөнхийлөгч та хоёрын харилцаа ямар байгаа вэ?
-Монгол Улсын Ерөнхийлөгч Х.Баттулга бид хоёр ойр нөхөрлөдөг нь үнэн. Цаашдаа ч ойр байна. Хэн нэгнээс урваж, шарвасан зүйлгүй.
-Гэхдээ таныг сүүлийн үед МАН-ыг дэмжиж байгаа гэх мэдээлэл олон нийтийн мэдээллийн хэрэгслээр явж байгаа харагдсан. Энэ үнэн үү?
-Хэн нэгнээс урваж, шарвасан зүйл байхгүй ээ. Бүх хүн сонгох эрхтэй шүү дээ. Сонголтоосоо айж, ичих ёсгүй. Миний хувьд энэ удаагийн сонгуульд тогтвортой засаглалыг дэмжиж байна.
-Та тогтвортой засаглал гэж МАН-аас нэр дэвшигч У.Хүрэлсүхийг дэмжихээ илэрхийлж байна уу?
-Тийм ээ. Бид үнэндээ сүүлийн 30 гаруй жил ороо бусгаа явж ирлээ. Дарангуйллын эсрэг, эрх чөлөө зэргээр 30 жил тархи, оюунаа угаалгаж ирсэн шүү дээ. Яг бодит хөгжил, бүтээн байгуулалт гээд хийсэн зүйл нь их цөөхөн. Мэдээж оносон зүйл бий л дээ. Гэхдээ бид одоо тогтвортой засаглалтай болох цаг ирсэн. Тиймээс би тогтвортой засаглалыг дэмжинэ. У.Хүрэлсүх даргыг тэр хүн нь мөн гэж итгэж байгаа.
-Ерөнхий сайд Л.Оюун-Эрдэнэ урлагийн салбарыг эдийн засгийн гол хүч болгоно гэж ярьсан. Тодруулбал, Холливүүдийн киног Монголд хийнэ гэж хүртэл мэдэгдсэн шүү дээ. Энэ мэдэгдэл тантай ямар нэг байдлаар холбоотой юу?
-Урлаг монголд хөгжих ёстой. Тэр дундаа Ерөнхий сайдын хэлдэг эдийн засгийн гол хүч болох бүрэн боломжтой гэж харж байгаа. Ард түмэн харин урлагийн салбар гэхээр л надтай холбож ойлгох юм. Миний дүү Ерөнхий сайд байснаар би давуу эрх эдлээд байсан зүйлгүй. Харин ч эсрэгээрээ илүү бэрхшээлтэй байдаг. Ерөнхий сайд Л.Оюун-Эрдэнэ “Херо” энтертайнментад хувь эзэмшдэг учир ашиг сонирхлын зөрчил гэдэг хуулийн дагуу л явна шүү дээ. Бусад хүмүүсийн хардаад байгаа шиг давуу эрх эдэлсэн зүйлгүй. Харин ч би олон арга хэмжээг “Херо” энтертайнмент гэхээсээ илүү нийгмийн хариуцлагын хүрээнд үнэгүй зохион байгуулж ирсэн.
-Олимпын аварга Н.Түвшинбаяр сүүлд таагүй хэрэгт орооцолдсон. Тухайн хэрэг гарах үед таныг тэнд очсон гэж дуулсан. Тэр талаар асууж болох уу?
-Би тухайн хэрэг гарсан үед очсон нь үнэн. Гэхдээ намайг очиход хэрэг болоод дууссан байсан. Тухайн хэрэг залууст сургамж болсон болов уу. Одоогоор хэрэг шалгагдаж буй учир би илүү мэдээлэл өгөх боломжгүй байна.
-Н.Түвшинбаяр аварга батлан даалтад суллагдсан. Та холбоо барьсан уу?
-Үгүй ээ. Одоогоор холбогдоогүй байна.
“Херо” Б.Баатар: Би сүүлийн үед МАН-ыг дэмжиж байгаа ч Х.Баттулгаас урваагүй |
|